ஜோதிகா பட முடிவு – சூர்யாவுக்குக் கண்டனமும் ஆதரவும்

ஜோதிகா, பாக்கியராஜ், பார்த்திபன் மற்றும் பிரதாப் போத்தன் ஆகியோர் முக்கிய வேடங்களில் நடித்திருக்கும் படம் ‘பொன்மகள் வந்தாள்’.சூர்யாவின் 2டி நிறுவனம் தயாரித்திருக்கிறது.

இந்தப்படத்தை நேரடியாக இணையதளத்தில் வெளீயிட முடிவு செய்து அமேசான் நிறுவனத்துக்கு அதற்கான உரிமை வழங்கப்பட்டுவிட்டதாகச் சொல்லப்படுகிறது. அதற்கான விலை ஒன்பது கோடி என்கிறார்கள்.

இதற்கு திரையரங்கு உரிமையாளர்கள் கடும் எதிர்ப்பு தெரிவித்திருக்கிறார்கள்.திரையரங்குகளை முற்றாக அழிக்கக்கூடிய இந்தச்செயலைச் செய்ததால், சூர்யாவின் 2டி நிறுவனம் தயாரிப்பில் உருவாகியிருக்கும் சூரரைப்போற்று படம் உட்பட எந்தப்படத்தையும் திரையிடமாட்டோம் என்று சொல்லியிருக்கிறார்கள்.

இந்த இக்கட்டான சூழலில் சூர்யாவின் சுய இலாபத்துக்காகச் செய்திருக்கும் இந்தச்செயல் கடும் கண்டனத்திற்குரியது என்கிறார் தயாரிப்பாளர் ராதாகிருஷ்ணன்.

ஒருபடத்தைத் தயாரிக்கும் தயாரிப்பாளருக்கு அதை எங்கு விற்கவேண்டும் என்கிற உரிமை உள்ளது, அதுமட்டுமின்றி காலச்சூழலுக்கு ஏற்ப நடக்கும் வியாபாரங்களை வரவேற்க வேண்டும் என்று சூர்யாவுக்கு ஆதரவாகப் பேசியிருக்கிறார் தயாரிப்பாளர் சதீஷ்குமார்.