சூரியின் அசத்தல் நடனம் அதிரடி உழைப்பால் பெரும் வரவேற்பு – மண்டாடி படக்குழு நெகிழ்ச்சி

இயக்குநர் மதிமாறன் புகழேந்தி எழுதி இயக்கியுள்ள “மண்டாடி” திரைப்படம்,பாரம்பரிய மீனவர்களின் படகுப்போட்டி கலாச்சாரத்தை பின்னணியாகக் கொண்ட ஒரு பிரம்மாண்ட ஆக்‌ஷன் கதையாகும்.மனிதனின் தளராத நம்பிக்கை,விடாமுயற்சி மற்றும் போராட்டக் குணத்தைப் போற்றும் வகையில் இப்படம் உருவாகியுள்ளது.

இப்படத்தில்,சூரி,சுஹாஸ்,மஹிமா நம்பியார்,சத்யராஜ்,ரவீந்திர விஜய்,அச்யுத் குமார்,பாலா சரவணன்,மிதுன்,கீர்த்திகா உள்ளிட்ட பலர் நடித்துள்ளனர்.

இப்படத்திற்கு ஜி.வி.பிரகாஷ் குமார் இசையமைக்க,எல்ரெட் குமாரின் ஆர்.எஸ். இன்ஃபோடைன்மென்ட் (RS Infotainment Pvt. Ltd.) நிறுவனம் பெரும் பொருட்செலவில் தயாரித்துள்ளது.

இப்படத்தின் படப்பிடிப்பு முழுமையாக நிறைவடைந்து,தற்போது இறுதிக்கட்டப் பணிகளில் தீவிரமாக இயங்கி வருகிறது.

இந்நிலையில்,படத்தின் சுவாரசியத்தை அதிகரிக்கும் வகையில் தயாரிப்பாளர்கள் வெளியிட்டுள்ள விளம்பரப் பாடல் (Promo Song), வெறும் விளம்பரமாக மட்டுமல்லாமல் நாடு தழுவிய அளவில் மாபெரும் அலையை உருவாக்கியுள்ளது.கதையின் கரடுமுரடான களத்தையும்,ஆக்‌ஷன் உத்வேகத்தையும் அப்பட்டமாகப் பிரதிபலிக்கும் இப்பாடல்,இணையவாசிகளின் பேரபிமானத்தைப் பெற்று வருகிறது.

ஜி.வி.பிரகாஷ் குமார் இசையமைப்பில்,வேல்முருகன் மற்றும் வாகீசன் ஆகியோரின் கம்பீரமான குரலில் உருவாகியுள்ள இப்பாடல், கேட்கும் கணத்திலேயே ஆடவைக்கும் துள்ளல் இசையால் உடனடி ‘சார்ட்பஸ்டர்’ பாடலாக மாறியுள்ளது.மேலும்,திரையரங்குகளில் திரையிடப்பட்டு வரும் இப்பாடலுக்கு,இரசிகர்கள் மத்தியில் இருந்து பெரும் ஆரவாரமும் கைதட்டல்களும் கிடைத்து வருகின்றன.

தமிழ்,தெலுங்கு,இந்தி,மலையாளம் மற்றும் கன்னடம் என 5 மொழிகளில் ஒரேநேரத்தில் வெளியான இப்பாடல்,அனைத்து மொழிகளிலுமே அமோக வரவேற்பைப் பெற்று வருகிறது.

இதுகுறித்து மண்டாடி படக்குழுவினர் பகிர்ந்ததாவது….

இன்ஸ்டாகிராம் ரீல்ஸ்,ஃபேஸ்புக் மற்றும் எக்ஸ் போன்ற சமூக வலைத்தளங்களில்,இரசிகர்கள் மற்றும் பயனர்கள் உருவாக்கிய ரிக்ரியேஷன் வீடியோ  மூலமாக மட்டுமே இப்பாடல்,75 மில்லியனுக்கும் அதிகமான பார்வைகளைக் கடந்து சாதனை படைத்துள்ளது. பாடலின் ‘ஹுக் ஸ்டெப்’ நடன அசைவுகளைப் பின்பற்றி ஆயிரக்கணக்கானோர் நடனமாடி ரீல்ஸ்களைக் குவித்து வருவதால்,சமீபகாலத்தில் வெளியான திரைப்பட விளம்பரப் பாடல்களில் மிகவும் பேசப்படும் பாடலாக இது உருவெடுத்துள்ளது.
இதன்தொடர்ச்சியாக,இப்பாடலின் தமிழ் யூடியூப் பதிப்பு,10 மில்லியனுக்கும் அதிகமான பார்வைகளைக் கடந்துள்ளது.

இப்பாடலின் பிரம்மாண்ட வெற்றிக்கு முதன்மைக் காரணியாக அமைந்தது,நடிகர் சூரியின் வியக்க வைக்கும் உடலமைப்பும் அவரது பவர்ஃபுல் நடன அசைவுகளுமே ஆகும்.நகைச்சுவை நடிகராகத் தனது பயணத்தைத் தொடங்கி,தற்போது நட்சத்திர கதாநாயகனாக முத்திரை பதித்துவரும் சூரி,இதில் சிக்ஸ்பேக் உடலமைப்பு,அதிரடியான நடன அசைவுகள் மற்றும் மிரட்டலான ‘ஸ்கிரீன் பிரசன்ஸ்’ மூலம் இரசிகர்களை வியப்பில் ஆழ்த்தியுள்ளார்.

கதாநாயகன் கதாபாத்திரத்திற்கு உயிரூட்டும் பொருட்டு,சூரி தீவிர உடற்பயிற்சிகள்,திறந்தவெளி கடல் சார்ந்த கடினமான பயிற்சிகள் மற்றும் ஆபத்தான கடல் சண்டைக்காட்சிகளில் டூப் இல்லாமல் தாமே துணிச்சலாக நடித்துள்ளார்.அவரது இந்த அர்ப்பணிப்பும், வெறித்தனம் நிறைந்த நடனமும் சமூகவலைத்தளங்களில் ஃபேன் எடிட்ஸ் மற்றும் வைரல் ட்ரெண்டுகளாக உருவெடுத்துள்ளன.

எங்களது விளம்பரப் பாடலுக்குக் கிடைத்துள்ள இந்த பிரம்மாண்ட வரவேற்பு — குறிப்பாக சூரியின் நடனம் மற்றும் அவரது உழைப்பிற்கு இரசிகர்கள் அளித்து வரும் பாராட்டுகள் எங்களுக்கு அளப்பரிய ஊக்கத்தைத் தந்துள்ளன.இரசிகர்கள் பாடலின் அசைவுகளை மறு உருவாக்கம் செய்து கொண்டாடுவதைப் பார்க்கும்போது,’மண்டாடி’திரைப்படம் ஏற்கனவே மக்கள் மனங்களில் ஆழமான இடத்தைப் பிடித்துவிட்டது என்பதை உணரமுடிகிறது.

இந்த விளம்பரப் பாடலின் வெற்றி,திரைப்படத்தின் விளம்பரப் பிரச்சாரத்திற்கு மிகச்சிறந்த தொடக்கமாக அமைந்துள்ளது.வரும் செப்டம்பர் 10, 2026 அன்று ‘மண்டாடி’ திரைப்படம் உலகம் முழுவதும் திரையரங்குகளில் வெளியாகவுள்ளது.தொடர்ந்து பேராதரவு அளித்து வரும் ஊடகநண்பர்கள்,இரசிகர்கள் மற்றும் திரைப்பட விரும்பிகளுக்கு எங்களது மனமார்ந்த நன்றியைத் தெரிவித்துக் கொள்கிறோம்.

அடுத்தடுத்து வெளியாகவுள்ள பாடல்கள்,அதிரடியான முன்னோட்டம் மற்றும் சிறப்பு விளம்பர காணொலிகளுடன் ‘மண்டாடி’ திரைப்படம் இந்த ஆண்டின் மிகப்பெரிய திரையரங்கு வெற்றியை நோக்கிச் சீறிப்பாயத் தயாராக உள்ளது என்று நம்பிக்கையாகச் சொல்கின்றனர்.