படப்பிடிப்பில் முள் குத்தியது – ரஜினி விளக்கம்

நடிகர் ரஜினிகாந்த் நேற்று முன் தினம் காலை அவர் திடீரென மைசூர் புறப்பட்டுச் சென்றார்.

அவர் மைசூர் செல்ல புறப்பட்ட விமானம் வானில் எழும்பிய சிறிது நேரத்தில் தொழில்நுட்பக் கோளாறு காரணமாக மீண்டும் கீழே இறங்கியது. பின்னர் 2 மணி நேரத்திற்குப்பின் மைசூர் புறப்பட்டுச் சென்றது.

அமெரிக்காவைத் தலைமையிடமாகக் கொண்ட உலகப் புகழ்ப்பெற்ற டிஸ்கவரி தொலைக்காட்சி சேனலின் ‘மேன் வெர்சஸ் வைல்ட்’ நிகழ்ச்சியில் நிகழ்ச்சியின் நாயகன் பியர் கிரில்ஸுடன் கலந்துகொண்டு அந்த நிகழ்ச்சியில் நடிப்பதற்காகவே அவர் மைசூர் சென்றார்.

அடர்ந்த வனப்பகுதியில் ஆபத்தான சூழ்நிலைகளில் எவ்வாறு உயிர் பிழைத்திருப்பது, அங்கிருந்து எப்படி தப்பி வருவது குறித்த நிகழ்ச்ச்சி அது. அமெரிக்க முன்னாள் அதிபர் ஒபாமா, பிரதமர் மோடி உள்ளிட்டோர் இந்நிகழ்ச்சியில் பியர் கிரில்ஸுடன் ஏற்கெனவே நடித்துள்ளனர்.

கர்நாடக மாநிலம் மைசூரில் உள்ள பந்திபுரா புலிகள் காப்பகத்தில் மேன் வெர்சஸ் வைல்டு நிகழ்ச்சிக்கான படப்பிடிப்பு நடந்தது.

2 நாட்கள் நடந்த இந்தப் படப்பிடிப்பில் நடிகர் ரஜினிகாந்த் நிகழ்ச்சித் தொகுப்பாளர் பியர் கிரில்ஸுடன் இணைந்து நடித்தார்.

இந்நிலையில் ரஜினிக்கு இந்தப் படப்பிடிப்பில் காயம் ஏற்பட்டதாக தகவல் வெளியானது.

நேற்றிரவு மைசூரிலிருந்து சென்னை திரும்பிய ரஜினிகாந்த் சென்னை விமான நிலையத்தில் பேட்டி அளித்தார். அப்போது அவர் கூறியதாவது….

“மேன்வர்சஸ் வைல்ட் ஷூட்டிங் டிஸ்கவரி சானலில் பேர் கிரில்ஸுடன் நடந்தது. மைசூர் பந்திப்பூரில் ஷூட்டிங் நடந்தது. அதை முடித்துவிட்டு வருகிறேன். அதில் எனக்கு அடிபட்டுவிட்டது என்று சொன்னார்கள். அதெல்லாம் ஒன்றுமில்லை ஷூட்டிங் நடந்த இடத்தில் நிறைய முட்கள் இருந்தது அதில் சில குத்தியது அவ்வளவுதான்”

எனக்கூறிவிட்டுச் சென்றார்.