சிவகார்த்திகேயன் நடிக்கும் இன்னொரு புதிய படம்
நடிகர் சிவகார்த்திகேயன் இப்போது ஏ.ஆர்.முருகதாஸ் இயக்கும் படத்தில் நடித்துக் கொண்டிருக்கிறார். அப்படத்தின் முதல்கட்டப் படப்பிடிப்பு இன்னும் சில நாட்கள் இருக்குமென்று சொல்லப்படுகிறது.
இதைத் தொடர்ந்து அமரன் படத்தின் இறுதிக்கட்டப் படப்பிடிப்பில் அவர் கலந்து கொள்ள வேண்டும்.அப்படத்தின் இறுதிக்கட்டப் படப்பிடிப்பு சுமார் இருபத்தைந்து நாட்கள் இருக்குமென்கிறார்கள்.அதன்பின் மீண்டும் ஏ.ஆர்.முருகதாஸ் படத்துக்குப் போகிறார்.
இவற்றிற்கடுத்து டான் பட இயக்குநர் சிபிச்சக்ரவர்த்தி இயக்கத்தில் ஒரு படம் நடிக்கவிருக்கிறார் என்றும் அப்படத்தை பேசன் ஸ்டுடியோஸ் நிறுவனம் தயாரிக்கவிருக்கிறதென்றும் சொல்லப்படுகிறது.
அதோடு, சத்யஜோதி ஃபிலிம்ஸ் நிறுவனத்தின் தயாரிப்பில் வெங்கட்பிரபு இயக்கத்தில் ஒரு படம் நடிக்க ஒப்புக்கொண்டுள்ளார் என்றும் சொல்கிறார்கள்.
இந்நிலையில் இன்னுமொரு புதியபடத்தில் நடிக்க அவர் ஒப்புக்கொண்டுள்ளதாகத் தகவல் உலவுகிறது.
அந்தப்படத்தை மாஸ்டர், லியோ உள்ளிட்ட படங்களைத் தயாரித்த செவன்ஸ்கிரீன் ஸ்டுடியோ லலித்குமார் தயாரிக்கவிருக்கிறார் என்றும் அயலான் பட இயக்குநர் ஆர்.இரவிக்குமார் இயக்கவிருக்கிறார் என்றும் தகவல்.இது தொடர்பான முதல்கட்டப் பேச்சுவார்த்தை வெற்றிகரமாக நடந்துவிட்டது என்றும் அடுத்தடுத்த விசயங்கள் குறித்த பேச்சுகள் நடக்கின்றனவாம். அவையும் சுமுகமாக நடந்து முடியும் என்று நம்பிக்கையாகச் சொல்கிறார்கள்.
இயக்குநர் ஆர்.இரவிக்குமார் இப்போது ட்ரீம்வாரியர் நிறுவனத்தின் தயாரிப்பில் சூர்யா கதாநாயகனாக நடிக்கவிருக்கும் புதியபடத்தை இயக்க ஒப்பந்தமாகியுள்ளார். அப்படத்தின் படப்பிடிப்பு ஏப்ரல் மாதத்தில் தொடங்கவுள்ளதாம்.
அந்தப்படத்தை முழுமையாக முடித்துவிட்டு அவர் வந்த பின்பு சிவகார்த்திகேயன் நடிக்கும் படத்தின் வேலைகளைத் தொடங்குவார் என்று சொல்கிறார்கள்.
இதற்குப் பல மாதங்கள் ஆகலாம்.
முன்னதாக, அயலான் படம் எதிர்பாராத விதமாகப் பல வருடங்கள் தாமதமாகிவிட்டது.அப்போதே கருணை அடிப்படையில் உங்கள் இயக்கத்தில் இன்னொரு படம் நான் நடிக்கிறேன் என்று இயக்குநர் ஆர்.இரவிக்குமாரிடம் சிவகார்த்திகேயன் சொல்லியிருந்தார். அப்போது சொன்னபடி இப்போது இந்தப்படம் முடிவாகியிருக்கிறதாம்.
அமரன் படம் மற்றும் ஏ.ஆர்.முருகதாஸ் இயக்கத்தில் அவர் நடிக்கும் படம் ஆகியன மட்டும்தான் இப்போது அதிகாரப்பூர்வமாக அறிவிக்கப்பட்டவை.
டான் இயக்குநர் சிபிச்சக்ரவர்த்தி இயக்கத்தில் அவர் நடிக்கவிருக்கும் படம் குறித்தும் வெங்கட்பிரபு இயக்கத்தில் அவர் நடிக்கவிருக்கும் படம் குறித்துமே இன்னும் அதிகாரப்பூர்வ அறிவிப்புகள் வெளியாகவில்லை.
அவ்விரண்டு படங்கள் குறித்து அறிவிக்கப்பட்ட பிறகு இப்படம் குறித்து அறிவிப்பு வெளியாகும் என்று சொல்கிறார்கள்.
