சுந்தர்.சி யுடன் மீண்டும் ஹிப்ஹாப் தமிழா – அரண்மனை 4 படவிவரங்கள்
தமிழ்த் திரையுலகில் வெற்றிகரமான இயக்குநராக வலம் வருபவர் சுந்தர்.சி. இரசிகர்களுக்காக மட்டுமே படம் என்பதில் உறுதியாக இருப்பவர் சுந்தர் சி.அவர் இயக்கும் படங்கள், சிறியவர் முதல் பெரியவர் வரை அனைவரும் இரசிக்கும்படி இருக்கும். தமிழில் பேய்ப் படங்களைக் குழந்தைகளும் கொண்டாடிப் பார்க்கும் வண்ணம் மாற்றியவர் அவர்.
அவர் இயக்கத்தில், 2014 ஆம் ஆண்டு வெளியாகி, குடும்பங்களைக் குதூகலப்படுத்திய பேய்ப் படம் அரண்மனை. இப்படத்தின் வெற்றிக்குப் பிறகு,2016 ஆம் ஆண்டு அரண்மனை 2 படமும் 2021 ஆம் ஆண்டு அரண்மனை 3 ஆகிய படங்கள் வெளியாகி வெற்றி பெற்றன.
முதல் மூன்று பாகங்களின் பிரம்மாண்ட வெற்றியை தொடர்ந்து, தற்போது நான்காம் பாகம், மிகப்பெரும் பொருட்செலவில், பெரும் நட்சத்திர கூட்டணியுடன் உருவாகி வருகிறது.
பென்ஸ் மீடியா பிரைவேட் லிமிடெட் (Benzz Media PVT LTD) சார்பில் ஏ.சி.எஸ்.அருண்குமார் மற்றும் அவ்னி சினி மேக்ஸ் (Avni Cinemax (P) Ltd) சார்பில் குஷ்பு சுந்தர் ஆகியோர் தயாரித்துள்ள அரண்மனை 4 படத்தை இயக்கி நடித்துள்ளார் சுந்தர்.சி.
இப்படத்தில் சுந்தர் சி, தமன்னா, ராஷி கண்ணா, யோகி பாபு, கோவை சரளா, சிங்கம்புலி,விடிவி கணேஷ், டெல்லி கணேஷ், ஜே பி, விச்சு, கே ஜி எஃப் ராம், சேசு, சந்தோஷ் பிரதாப், தீரஜ் விஷ்ணு ரத்தினம், எஸ்.நமோ நாராயணன், மொட்டை ராஜேந்திரன் உட்பட பலர் நடித்துள்ளனர்.
இப்படத்துக்கு எழுத்து இயக்கம் – சுந்தர் சி,வசனம் – வேங்கட் ராகவன்,இசை – ஹிப்ஹாப் தமிழா,ஒளிப்பதிவு – இசக்கி கிருஷ்ணசாமி,படத்தொகுப்பு – ஃபென்னி ஆலிவர்,கலை இயக்கம் – பொன்ராஜ்,சண்டைப்பயிற்சி – ராஜசேகர்.கே.
இப்படத்தின் முதல்பார்வையை தற்போது வெளியிட்டுள்ள படக்குழு,இப்படம், 2024 பொங்கல் அன்று வெளியாகவுள்ளதாகவும் அதிகாரப்பூர்வமாக அறிவித்துள்ளது.
அரண்மனை 2 படத்துக்கு இசையமைத்திருந்தார் ஹிப்ஹாப் தமிழா.அரண்மனை 3 இல் அவர் இல்லை. இப்போது இந்தப்படத்தில் மீண்டும் இணைந்திருக்கிறார்.
