வதந்தியைப் பொய்யாக்கிய சேயோன் – விவரம்
தாய்க்கிழவி இயக்குநர் சிவகுமார் முருகேசன் இயக்கத்தில் சிவகார்த்திகேயன் நடிப்பதாக அறிவிக்கப்பட்ட படம் சேயோன்.
அந்தப்படக்குழு இன்று வெளியிட்டுள்ள செய்திக்குறிப்பு….
நடிகை பாக்யஸ்ரீ போர்ஸின் பிறந்தநாள் எனும் இந்தச் சிறப்புமிக்க நன்னாளில் அவர் ‘சேயோன்’ திரைப்படத்தில் அதிகாரப்பூர்வமாக இணைந்துள்ளார் என்பதை ராஜ்கமல் ஃபிலிம்ஸ் இன்டர்நேஷனல் மற்றும் டர்மெரிக் மீடியா நிறுவனங்கள் மிகுந்த மகிழ்ச்சியுடன் அறிவிக்கின்றன.
ஒரு சக்திவாய்ந்த புதிய கதாபாத்திரத்தில் சிவகார்த்திகேயன் நடித்து, சிவகுமார் முருகேசன் இயக்கத்தில் உருவாகும் ‘சேயோன்’ ஒரு பிரம்மாண்டமான கிராமியப் பின்னணி கொண்ட பொழுதுபோக்குத் திரைப்படமாகவும், 2026 ஆம் ஆண்டின் மிக அதிகம் எதிர்பார்க்கப்படும் வெளியீடுகளில் ஒன்றாகவும் அமைகிறது.
ராஜ்கமல் ஃபிலிம்ஸ் இன்டர்நேஷனல் நிறுவனத்தின் கீழ் கமல்ஹாசன் மற்றும் ஆர்.மகேந்திரன் தயாரிக்கும் இப்படத்திற்கு, சந்தோஷ் நாராயணன் இசையமைக்கிறார்.
இரசிகர்கள் பாக்யஸ்ரீ போர்ஸின் பிறந்தநாளைக் கொண்டாடி வரும் இவ்வேளையில், இந்த அறிவிப்பைப் பகிர்வதற்கு இதுவே மிகச் சிறந்த தருணமாக அமைவதுடன், மகிழ்ச்சியும் வெற்றியும் நிறைந்த ஒரு அற்புதமான ஆண்டாக வரவிருக்கும் காலம் அமைய, அவருக்கு அனைவரும் தங்கள் மனமார்ந்த வாழ்த்துகளைத் தெரிவித்துக்கொண்டனர்.
பாக்யஸ்ரீ போர்ஸை ‘சேயோன்’ குடும்பத்திற்கு அன்புடன் வரவேற்று மகிழ்வதுடன்,இத்திறமைமிக்க நடிகை இந்த விறுவிறுப்பான திரைப்படத்தின் ஒரு அங்கமாக இணைந்திருப்பதால் படக்குழுவினர் ஒரு உற்சாகமான திரைப்பயணத்தை மேற்கொள்ள ஆவலுடன் காத்திருக்கின்றனர்.
இவ்வாறு அதில் கூறப்பட்டுள்ளது.
இந்தப்படத்தின் படப்பிடிப்பு பிப்ரவரி மாதமே தொடங்கும் என எதிர்பார்க்கப்பட்டது. அதன்பின் மார்ச் 27 என்று சொல்லப்பட்டது. அப்போதும் தொடங்காமல் ஏப்ரல் 27 இல் தொடங்கும் என்றார்கள்.
அப்போதும் தொடங்கவில்லை.அதேநேரம் மே 15 முதல் படப்பிடிப்பு என்று சொல்லியிருக்கிறார்கள்.
இந்நிலையில், கடந்த சில நாட்களாக ராஜ்கமல் நிறுவனம் பணப்பிரச்சினையில் இருக்கிறது. அதனால் அந்நிறுவனம் அறிவித்திருக்கும் சேயோன் உட்பட எந்தப்படமும் நடக்காது என்றொரு தகவல் வேகமாகப் பரவிக்கொண்டிருந்தது.
அதிகாரப்பூர்வமற்ற அந்தத் தகவல், அதிகாரப்பூர்வ செய்தியாக வரும் என்று சிலர் சொல்லிக்கொண்டிருந்த வேளையில் அது வதந்தி என்று இந்த அறிவிப்பின் மூலம் வெளிப்படுத்தியிருக்கிறது ராஜ்கமல் நிறுவனம்.
