திரைப்பட சங்கங்கள் எடுத்த முக்கிய முடிவுகள் – நடிகர் நடிகைகளுக்கு சிக்கல்

தமிழ்த் திரைப்படத் தயாரிப்பாளர்கள் சங்கம், நடப்பு தயாரிப்பாளர்கள் சங்கம்,தமிழ்நாடு திரைப்பட விநியோகஸ்தர்கள் சங்கம் மற்றும் தமிழ்நாடு திரையரங்கு உரிமையாளர்கள் ஆகியனவற்றின் நிர்வாகிகள் அடங்கிய கூட்டம் மார்ச் 14 அன்று நடைபெற்றது.

அந்தக்கூட்டம் முடிந்தவுடன் வெளியிடப்பட்டிருக்கும் செய்திக்குறிப்பு….

தமிழ்த் திரைப்படத்துறையின் நலன் கருதி,தமிழ்த் திரைப்படத் தயாரிப்பாளர்கள் சங்கத்தின் தலைவர் திரு.ஜி.கே.எம்.தமிழ்க்குமரன் அவர்கள் தலைமையில், செயலாளர்கள் திரு.எஸ்.கதிரேசன், திரு.ஆர்.இராதாகிருஷ்ணன், துணைத்தலைவர் திரு.கமலக்கண்ணன், இணைச்செயலாளர் திருமதி.சுஜாதா விஜயக்குமார், பொருளாளர் திரு.என்.சுபாஷ் சந்திர போஸ் மற்றும் முன்னாள் தலைவர் திரு.கேயார், தமிழத் திரைப்பட நடப்பு தயாரிப்பாளர்கள் சங்கத்தின் தலைவர் திரு.டி.ஜி.தியாகராஜன், செயலாளர் திரு.டி.சிவா, பொருளாளர் திரு.தனஞ்செயன் தயாரிப்பாளர்கள் திரு.ஆர்.பி.சௌத்ரி, திரு.ஐசரி கணேஷ், திரு.சந்திரபிரகாஷ் ஜெயின், திரு.ஏ.எல்.அழகப்பன், திரு.பிரமிட் நடராஜன், திரு.ஏ.எம். ரத்னம், திரு.முகேஷ் மேத்தா மற்றும் தமிழ்நாடு திரைப்பட திரையரங்க உரிமையாளர்கள் சங்கத்தின் தலைவர் திரு.திருப்பூர் சுப்ரமணியம், செயலாளர் திரு.ரோகிணி பன்னீர்செல்வம், மற்றும் நிர்வாகிகள், தமிழ்நாடு திரைப்பட விநியோகஸ்தர்கள் சங்கத்தின் தலைவர் திரு.அருள்பதி, மற்றும் நிர்வாகிகள் மற்றும் திரையுலகைச் சார்ந்த பலரும் கலந்துகொண்ட கலந்துரையாடல் கூட்டம் இன்று 14.03.2026 சனிக்கிழமை காலை 11 மணி அளவில் சென்னை தனியார் ஹோட்டலில் நடைபெற்றது.

அக்கூட்டத்தில், திரைத்துறையின் நலன் கருதி பல முக்கிய முடிவுகள் எடுக்கப்பட்டுள்ளன. அதில் குறிப்பாக….

திரைப்படங்கள் வெளியீட்டிற்கும்,ஓடிடி (OTT) வெளியீட்டை முறைப்படுத்துவதற்கும் தயாரிப்பாளர்கள், விநியோகஸ்தர்கள், திரையரங்க உரிமையாளர்கள் அடங்கிய கூட்டுக்குழு (Joint Action Committee) அமைப்பது என்றும், இந்த கூட்டுக்குழு எடுக்கும் முடிவிற்கு திரைத்துறையினர் கட்டுபட வேண்டும் என்றும் ஏகமனதாக தீர்மானம் நிறைவேற்றப்பட்டுள்ளது.

ஒரு நடிகர், நடிகையர், இயக்குநர், முன்னணி தொழில்நுட்பக் கலைஞர்கள் எந்த ஒரு தயாரிப்பாளரிடம் முதலில் அட்வான்ஸ் வாங்குகிறார்களோ அந்தத் தயாரிப்பாளருக்கு முன்னுரிமை கொடுத்து திரைப்படத்தினை முடித்துத் தரவேண்டும் என்று ஏகமனதாக தீர்மானம் நிறைவேற்றப்பட்டுள்ளது.

திரைப்படங்களில் நடிக்கும் நடிகர், நடிகையர், இயக்குநர், முன்னனி தொழில்நுட்பக் கலைஞர்கள், இணையதளத் தொடர்களில் நடிக்கவோ, இயக்கம் செய்யவோ செல்லக்கூடாது. அவ்வாறு செல்லும் நடிகர், நடிகையர், முன்னணி தொழில்நுட்பக் கலைஞர்கள் திரைப்படங்களில் பணிபுரிய கூட்டுக்குழு எடுக்கும் முடிவிற்குக் கட்டுப்பட வேண்டும் என ஏகமனதாக தீர்மானம்
நிறைவேற்றப்பட்டுள்ளது.

இவ்வாறு அந்தச் செய்திக்குறிப்பில் கூறப்பட்டுள்ளது.