February 12, 2025
சினிமா செய்திகள்

தக்லைஃப் வெளியீடு ஏழு மாதங்கள் தள்ளிப்போனது ஏன்?

மணிரத்னம் இயக்கத்தில் கமல்ஹாசன் நடித்துக் கொண்டிருக்கும் படம் தக் லைஃப்.இப்படத்தில் சிம்பு, த்ரிஷா, கௌதம் கார்த்திக், ஜோஜு ஜார்ஜ், ஐஸ்வர்யா லக்‌ஷ்மி, அபிராமி, நாசர் உள்ளிட்ட பலர் முக்கிய கதாபாத்திரங்களில் நடித்துள்ளனர். ராஜ்கமல் மற்றும் மெட்ராஸ் டாக்கீஸ் நிறுவனங்கள் இணைந்து தயாரிக்கும் இப்படத்தை கமலுடன் இணைந்து ரெட் ஜெயண்ட் நிறுவனம் வழங்குகிறது.

இப்படத்திற்கு ஏ.ஆர்.ரகுமான் இசையமைத்து வருகிறார்.

இப்படத்தின் பெயர் அறிவிப்பு கடந்த வருடம் கமல்ஹாசனின் பிறந்தநாளான நவம்பர் 7 ஆம் தேதி வெளியானது.

அதையடுத்து படத்தின் படப்பிடிப்பு தொடங்கியது. மே மாதம் இப்படத்தில் சிம்பு இணைந்திருப்பதாக அறிவிக்கப்பட்டது.

இப்படத்தின் படப்பிடிப்பு செர்பியா, அயர்லாந்து, ராஜஸ்தான், டெல்லி, கோவா, சென்னை உள்ளிட்ட பல்வேறு பகுதிகளில் நடைபெற்றுது.படப்பிடிப்பு முழுமையாக முடிவடைந்துவிட்டதாக அறிவிக்கப்பட்டது.ஆனால் கமல் நடிக்க வேண்டிய காட்சிகள் மட்டுமே முழுமையாகப் படமாக்கப்பட்டுள்ளன என்றும் ஒரு பாடல் உட்பட பல காட்சிகளின் படப்பிடிப்பு நடக்க வேண்டியிருக்கிறது என்று சொல்கிறார்கள்.

இந்த நிலையில் கமல்ஹாசனின் பிறந்தநாளான இன்று படத்தின் வெளியீட்டுத் தேதி அறிவிக்கப்பட்டுள்ளது.அதன்படி இப்படம் 2025 ஆம் ஆண்டு ஜூன் 5 ஆம் தேதி வெளியாகும் எனத் தெரிவிக்கப்பட்டுள்ளது.

இவ்வாண்ட் இறுதிக்குள் வெளியாகும் என்கிற முந்தைய அறிவிப்பையும் அடுத்த ஆண்டு தொடக்கத்தில் பொங்கல் நாளில் இப்படம் வெளியாகும் என்கிற எதிர்பார்ப்பையும் பொய்யாக்கிவிட்டது இன்றைய அறிவிப்பு.

இயக்குநர் மணிரத்னத்தைப் பொறுத்தவரை வேகமாகப் படமெடுத்துவிடுவார்.படப்பிடிப்பு மற்றும் அதற்குப் பிறகான பணிகளையும் திட்டமிட்டு சரியாகச் செய்துவிடக்கூடியவர்.

அப்படி இருக்கும்போது படப்பிடிப்பு முழுமையாக முடிவடைந்துவிட்டது என்று சொல்லப்படும் இப்படத்தின் வெளியீட்டை ஏழு மாதங்கள் தள்ளி வைக்கப்பட்டது ஏன்? அதுவும் கோடை விடுமுறையையும் பயன்படுத்தாமல் அதற்கும் தள்ளிப் போவது ஏன்>

இதுகுறித்து விசாரித்தால்..

இப்படத்தில் வி எஃப் எக்ஸ் எனப்படும் கணினி வரைகலைக்காட்சிகள் நிறைய இடம்பெறவிருக்கிறதாம்.அக்காட்சிகளை நேர்த்தியாக உருவாக்க சில மாதங்கள் தேவை என்று அக்குழுவினர் சொல்லிவிட்டார்களாம்.அதனால் படத்தின் வெளியீடு சில மாதங்கள் தள்ளிப் போனாலும் தாழ்வில்லை.படம் சிறப்பாக வரவேண்டும் என்பது ஒரு காரணம்.

இன்னொன்று,கோடை விடுமுறையில் லோகேஷ் கனகராஜ் இயக்கத்தில் ரஜினி நடிக்கும் கூலி படம் ஏப்ரல் மாதத்திலும் அதைத் தொடர்ந்து அஜீத்தின் குட் பேட் அக்லி படம் மே மாதத்திலும் வெளியாகவிருக்கின்றன என்பதால் ஜூன் மாதம் 5 ஆம் தேதி இப்படம் வெளியாகும் என்று அறிவித்திருக்கிறார்கள்.

Related Posts