ரஜினி படத்தில் நடிக்க மறுத்த விக்ரம் – விவரங்கள்
நெல்சன் திலீப்குமார் இயக்கத்தில் நடிகர் ரஜினிகாந்த் நடித்துள்ள ‘ஜெயிலர்’ படம் ஆகஸ்ட் 10 ஆம் தேதி வெளியாகும் என அறிவிக்கப்பட்டிருக்கிறது.
இந்தப்படத்தைத் தொடர்ந்து லைகா நிறுவனம் தயாரிக்கும் இரண்டு படங்களில் நடிக்க அவர் ஒப்பந்தமாகியிருக்கிறார்.
ரஜினியின் மகள் ஐஸ்வர்யா ரஜினிகாந்த் இயக்கும் ‘லால் சலாம்’ படத்தை லைகா தயாரிக்கிறது. இதில் ரஜினி சிறப்புத் தோற்றத்தில் நடிக்கிறார். இப்படத்தின் படப்பிடிப்பு தற்போது நடந்துவருகிறது.
லால் சலாம் படத்தைத் தொடர்ந்து ரஜினி நடிக்கும் 170 ஆவது படத்தின் அதிகாரபூர்வ அறிவிப்பை மார்ச் 23 அன்று லைகா நிறுவனம் வெளியிட்டது.
அதில், ரஜினியின் 170 ஆவது படத்தின் பணிகள் இனிதே ஆரம்பமாகியுள்ளன. படத்தை ‘ஜெய்பீம்’ படத்தின் மூலம் புகழ்பெற்ற இயக்குநர் த.செ.ஞானவேல் இயக்க, அனிருத் இசையமைக்கிறார். இப்படம் அடுத்த ஆண்டு (2024) வெளியாகும் என கூறப்பட்டிருந்தது.
இந்தப்படத்துக்கான திரைக்கதை எழுதும் பணிகள் நிறைவடைந்திருக்கின்றன என்று சொல்லப்படுகிறது.
இந்நிலையில், அந்தக்கதையில் மிகவும் சக்தி வாய்ந்த வில்லன் வேடம் இருக்கிறதாம்.
அந்த வேடத்தில் விக்ரம் நடித்தால் சிறப்பாக இருக்கும் என்று இயக்குநர் நினைத்திருக்கிறார்.
அதை ரஜினியும் ஒப்புக்கொண்டாராம். தயாரிப்பு நிறுவனத்துக்கும் அதில் மகிழ்ச்சி.
இதனால், விக்ரமை தொடர்புகொண்டு தகவலைச் சொல்லியிருக்கிறார்கள். அவர், உடனே மறுத்துவிட்டாராம்.
ஆனாலும் விடாமல், கதையைக் கேட்டுப்பாருங்கள் உங்களுக்குக
கண்டிப்பாகப் பிடிக்கும் என்று வலியுறுத்தினார்களாம்.
அதனால் இயக்குநர் த.செ.ஞானவேலை அழைத்து கதை கேட்டிருக்கிறார்.
அதன்பின்பும் நடிக்க ஒப்புக்கொள்ளவில்லையாம்.
அவரை ஒப்புக்கொள்ள வைக்கும் முயற்சிகள் தொடர்கின்றன என்றும் இதுவரை அவர் உடன்படவில்லை என்றும் சொல்கிறார்கள்.
இறுதியில் என்ன நடக்கிறதெனப் பொறுத்திருந்து பார்ப்போம்.
