ஒரு மாதிரியெல்லாம் ஒரே மாதிரியல்ல – சுந்தர் சி சொன்ன சுவாரசிய கதை

சுந்தர்.சி இயக்கிய அரண்மனை மற்றும் அரண்மனை 2 ஆகிய பேய்ப் படங்கள் நகைச்சுவையோடு குடும்பங்களும்,குழந்தைகளும் கொண்டாடும் வகையில் வெளியாகி வெற்றி பெற்ற படங்கள்.

அரண்மனை முதல் மற்றும் இரண்டாம் பாகங்களின் வெற்றிக்குப் பிறகு தற்போது சுந்தர்.சி இயக்கத்தில் ஆர்யா, ராஷிக்கண்ணா நடிப்பில் அரண்மனை 3 திரைப்படம் உருவாக்கப்பட்டு வெளியீட்டுக்குத் தயாராகி உள்ளது. அவ்னி சினிமேக்ஸ் நிறுவனம் சார்பில் குஷ்பு தயாரிக்க சி.சத்யா இசையமைக்கிறார் .

ஆர்யா, ராஷிகண்ணா, சுந்தர்.சி ஆகியோர் முதன்மை கதாபாத்திரங்களில் நடிக்க,விவேக், யோகி பாபு, ஆண்ட்ரியா,மனோபாலா,சம்பத்,சாக்‌ஷி அகர்வால், மதுசூதன ராவ், வின்சென்ட் அசோகன், வேல ராமமூர்த்தி, நளினி, விச்சு விஸ்வநாத் ஆகியோர் முக்கிய பாத்திரங்களில் நடித்துள்ளனர்.

அக்டோபர் 14 ஆம் தேதி வெளியாகவிருக்கும் இந்தப் படத்தின் பத்திரிகையாளர்கள் சந்திப்பு அக்டோபர் 10 அன்று நடைபெற்றது.

நிகழ்வில் நடிகர் ஆர்யா பேசியதாவது…..

அனைவருக்கும் வணக்கம். இந்தப் படத்தில் நடிப்பதற்காக சுந்தர்.சி சாரிடம் இருந்து எனக்கு அழைப்பு வந்தது. அவரைச் சந்தித்தேன். இந்தப் படத்தில் நடிப்பது பற்றி அவர் என்னிடம் சொன்னபோது, நான் இதுவரை பேய்ப்படமே பார்த்தது கிடையாது, பேய்ப் படத்தில் எனக்கு எப்படி நடிப்பது என்று தெரியவில்லையே? என்று கூறினேன். அது மிகவும் ஈசிதான் நான் பார்த்துக்கொள்கிறேன் என்று சொன்னார். இப்படத்தில் விவேக் சாருடன் நடித்தது மிக்க மகிழ்ச்சியாக இருந்தது. அவருடன் பயணித்த அந்த 40 நாட்கள் மறக்க முடியாதவை. நான் அவரது மிகப்பெரிய ரசிகன். இந்தப் படத்தில் நடித்த அனைவருமே மிகச் சிறப்பாக நடித்துள்ளனர்.மிகவும் சிறப்பாக இசையமைத்துள்ளார் சத்யா.இப்படத்தை வெளியிடும் ரெட் ஜெயண்ட் உதயநிதி அவர்களுக்கு நன்றி. இப்படம் கண்டிப்பாக உங்கள் அனைவருக்கும் பிடிக்கும். திரையரங்குகளில் இப்படம் வெளியாவது எனக்கு மகிழ்ச்சி அளிக்கிறது.

நடிகை ராஷி கண்ணா பேசியதாவது…..,

இப்படத்தில் எனக்கு வாய்ப்பளித்த சுந்தர் சி,குஷ்பூ ஆகியோருக்கு என் நன்றியைத் தெரிவித்துக் கொள்கிறேன். ஆர்யா கடின உழைப்பாளி. அரண்மனை 3 படத்தில் நடித்துக் கொண்டிருக்கும்போது சார்பாட்டா பரம்பரை படத்திலும் நடித்துக் கொண்டிருந்தார். இந்தப் படத்தை வெளியிட்டு சப்போர்ட் செய்யும் உதயநிதி அவர்களுக்கு நன்றி .கண்டிப்பாக இந்தத் திரைப்படம் உங்கள் அனைவருக்கும் பிடிக்கும்.தியேட்டரில் இப்படத்தைக் காண ஆவலுடன் காத்திருக்கிறேன்.

இசையமைப்பாளர் சி.சத்யா பேசியதாவது…..,

இந்தப் படம் எனக்கு 25 ஆவது படம். இந்தத் திரைப்படத்திற்கு பின்னணி இசை அமைப்பதில் எனக்கு அதிக நாட்கள் தேவைப்பட்டது.20 நாட்களில் முடிக்குமாறு என்னை இயக்குநர் கேட்டுக் கொண்டார். ஆனால் இந்த லாக்டௌன் எனக்கான நாட்களை அதிகப்படுத்தியது. அதிக நாட்கள் எடுத்துக்கொண்டு சிறப்பாக படத்திற்கு இசை அமைத்துள்ளேன். அரண்மனை பட மற்ற பாகங்களைவிட இந்த மூன்றாம் பாகத்தில் எமோஷனல் சீன்கள் அதிகமாக இருக்கின்றன.

நடிகர் மனோபாலா பேசியதாவது….

குஜராத்தில் கிட்டத்தட்ட 40 நாட்களுக்கும் மேலாகத் தங்கியிருந்து படப்பிடிப்பு முடித்தோம். மறக்க முடியாத நினைவுகள். காலையில் 7 மணிக்கு சூட்டிங் சென்றுவிட்டு இரவு பத்து மணிக்குத் திரும்புவோம். படப்பிடிப்பு போவதே தெரியாது. இதில் நடித்தது எனக்கு மிகவும் மகிழ்ச்சியாக இருக்கிறது விவேக் சாருடன் நடித்த அந்த நாட்கள் மறக்க முடியாதவை அவரின் இழப்பு வருத்தத்தை அளிக்கிறது.

இயக்குநர் சுந்தர்.சி பேசியதாவது……,

நீண்ட நாட்களுக்குப் பிறகு உங்கள் அனைவரையும் சந்திப்பதில் மிக்க மகிழ்ச்சி. அரண்மனை பாகங்கள் இரண்டும் நீங்கள் மற்றும் ரசிகர்கள் ஆதரவுடன் மிகப் பெரிய வெற்றி அடைந்தது. எல்லோரும் சொல்வார்கள் அரண்மனை படத்தை ஈசியாக எடுத்து விட்டீர்கள் என்று, ஆனால் அது மிகவும் கஷ்டம்.

அரண்மனை மாதிரியும் இருக்கவேண்டும் ஆனால் அதேமாதிரியும் இருக்கக்கூடாது என்கிற சிக்கலான நிலை.ஒரு மாதிரியெல்லாம் ஒரேமாதிரி இல்லை என்று சொல்வார்கள். மனநலக் காப்பகம் ஒன்ரில் இருந்த ஒருவர் சுவரெல்லாம் பார்வதி, பார்வதி என்று எழுதி வைத்திருந்தாராம். யார் இவர்? ஏன் இப்படி? எனக்கேட்டபோது, பாரவதியைக் காதலித்தார், பார்வதி வேறொருவரைத் திருமணம் செய்துகொண்டதால் இவர் பைத்தியமாகிவிட்டார் என்றார்களாம். இன்னோரு இடத்தில் வேறொருவரும் பார்வதி, பாரவதி என சுவற்றில் எழுதி வைத்திருந்தாராம். இவர் யார்? எனக்கேட்டதற்கு, அந்தப் பார்வதியைத் திருமணம் செய்தவர் இவர்தான், அப்பெண்ணின் டார்ச்சர் தாளாமல் பைத்தியம் ஆகிவிட்டார் என்று சொன்னார்களாம். இந்த நிலைதான் எங்களுக்கும்.

அரண்மனை மாதிரியான படங்களை மக்கள் விரும்புமாறு கொடுப்பது கொஞ்சம் கஷ்டம்தான்.ஏற்கனவே உள்ள விசயங்களை விட கொஞ்சம் வேறுபட்டதாக இருக்க வேண்டும். அரண்மனை படத்தின் இரண்டு பாகங்களுமே நல்ல வசூலையும் வெற்றியையும் தந்தது. ஆனால் உடனடியாக அதன் அடுத்த பாகத்தை எடுக்க முடியாது.அதற்கான கதையும் நடிகர்கள்,தொழில்நுட்பக் குழுக்களும் அமைந்தால் மட்டுமே சாத்தியம்.

அப்ப்டி ஒரு கதை அமைந்தது. என்க்கு முழுதிருப்தியாகக் கதை அமைந்ததும் படத்தைத் தொடங்கினோம்.

மற்ற நடிகர்களைப் போல் நடித்து கொடுத்துவிட்டுச் செல்லாமல் பிசினஸ் ரீதியாகவும் எனக்கு உதவியாக இருந்தார் ஆர்யா.

அரண்மனை படம் என்றாலே நடிகைகளுக்கு முக்கியத்துவம் இருக்கும். இந்தப் படத்திலும் ஆண்ட்ரியா,
ராஷி கண்ணா,சாக்ஷி அகர்வால் எல்லாருக்குமே முக்கிய கதாபாத்திரம் தான்.

அரண்மனை பாகம் 1 உதயநிதி அவர்கள் வெளியிட்டார்.தற்போது அரண்மனை 3 திரைப்படத்தை பிரம்மாண்டமான முறையில் வெளியிடுகிறார். இந்தப் படத்தை பார்த்த ஒரே நபர் உதயநிதி அவர்கள் மட்டும்தான்.
அரண்மனை 1 படத்தைப் பார்த்து கண்டிப்பாக வெற்றி பெறும் என்று சொன்னவரும் அவர்தான்.தற்போது அரண்மனை 3 படத்தைப் பார்த்துவிட்டு அருமையாக இருக்கிறது என்று சொன்னவரும் அவர்தான். என்னுடைய படங்கள் எல்லாமே கமர்சியல் படம்தான்.படத்தைப் பார்க்கின்ற சிறுவர்கள் பொதுமக்கள் தாய்மார்கள் அனைவருமே கவலையை மறந்து ரசிக்க வேண்டும் என்பது தான் என்னுடைய நோக்கம். அரண்மனை இரண்டு பாகங்களை விட அரண்மனை 3 பிரமாண்டமாக தயாரிக்கப்பட்டுள்ளது.

இவ்வாறு அவர் பேசினார்.