ரெட்ட தல படத்தில் இணைந்த தனுஷ் – விவரம்
மான் கராத்தே இயக்குநர் கிரிஷ் திருக்குமரன் இயக்கி வரும் படம் “ரெட்ட தல”. அருண் விஜய் நாயகனாக நடிக்கும் இப்படத்தில் சித்தி இத்னானி அவருக்கு ஜோடியாக நடிக்கிறார். இவர்களுடன் தான்யா ரவிச்சந்திரன், ஹரீஷ் பேரடி, யோகேஷ் சாமி, ஜான் விஜய், பாலாஜி முருகதாஸ் ஆகியோர் முக்கிய கதாபாத்திரங்களில் நடிக்கிறார்கள்.
இப்படத்துக்கு ஒளிப்பதிவு – டிஜோ டாமி, படத்தொகுப்பு – ஆண்டனி, சண்டைப் பயிற்சி – பிசி ஸ்டண்ட்ஸ்,கலை இயக்கம் – அருண்சங்கர் துரை,உடை வடிவமைப்பு – கிருத்திகா சேகர்
இப்படத்தினை பிடிஜி யுனிவர்சல் நிறுவனம் சார்பில் பாபி பாலச்சந்திரன், அருண் விஜய் திரை வாழ்க்கையில் இதுவரை இல்லாத வகையில் மிகப்பிரம்மாண்ட படைப்பாகத் தயாரிக்கிறார்.
இந்தப் படத்திற்காக முன்னணி நட்சத்திர நடிகர் தனுஷ் பாடல் ஒன்றைப் பாடியுள்ளார்.
இசையமைப்பாளர் சாம் சி.எஸ் இசையில் உருவாகியுள்ள இந்த அழகான பாடலை தனுஷ் பாடியுள்ளார். இப்பாடலுக்கான படப்பிடிப்பு வெளிநாட்டில் நடந்தது. பல இடங்களில் மிகபிரம்மாண்டமாக படமாக்கியுள்ளனர். விரைவில் இப்பாடல் லிரிகல் வீடியோ வடிவில் வெளியிட திட்டமிடப்பட்டுள்ளது.
நடிகர் தனுஷ் இயக்கத்தில் நடிகர் அருண் விஜய் நடிக்கும் படம் இட்லி கடை.இவ்விருவர் கூட்டணியில் உருவாகும் “இட்லி கடை” படத்திற்கு இரசிகர்கள் மத்தியில் பெரும் எதிர்பார்ப்பு நிலவி வரும் நிலையில், இந்தக் கூட்டணி மீண்டும் ரெட்ட தல படத்தில் இணைந்துள்ளது.
இரண்டு முன்னணி நட்சத்திர நடிகர்கள் எந்தவித ஈகோவும் இல்லாமல்,அடுத்தடுத்து இணைந்து பணியாற்றுவது இரசிகர்களிடையே பாராட்டுகளைப் பெற்று வருகிறது.
தனுஷ் பாடியிருப்பது படக்குழுவுக்கு உற்சாகத்தையும் தயாரிப்பாளருக்கு தெம்பையும் கொடுத்திருக்கிறது.
